Tibbiyot yoʻnalishidagi kollej va texnikumlarning oʻquvchilariga nemis tilini oʻrganish uchun maxsus to‘garaklar tashkil qilinadi
Sirdaryo Abu Ali ibn Sino nomidagi Jamoat salomatligi texnikumida Oliy taʼlim, fan va innovatsiyalar vazirligi xodimlari va Sirdaryo viloyati Kambagʻallikni qisqartirish va bandlik boshqarmasi bilan hamkorlikda taʼlim muassasalari bitiruvchilari bilan xorijiy tillarga oʻqitish imkoniyatlari boʻyicha uchrashuv tashkil etildi.
Unda professional taʼlim muassasalari oʻquvchilariga xorijiy tillar, xususan nemis, ingliz, yapon va koreys tillarini oʻrganish imkoniyatini yaratish masalalari muhokama qilindi. Xorijiy tillarga oʻqitish dars vaqtidan tashqari vaqtda toʻgaraklar sifatida tashkil qilinishi taʼkidlandi.
Xorijiy tillarni oʻrganish oʻquvchilarni zamonaviy adabiyotlardan foydalangan holda oʻz bilimlarini oshirish hamda kelgusida ichki va tashqi mehnat bozorida munosib oʻrin egallash imkoniyatlarini yaratadi.
Uchrashuvda Guliston davlat universitetining professor-oʻqituvchilari ham ishtirok etib, yoshlarning xorijiy tillarni oʻrganishi ularga mehnat bozorida keng imkoniyatlar yaratishi haqida fikr va takliflar bildirildi.
Suhbat yakunida Sirdaryo Abu Ali ibn Sino nomidagi Jamoat salomatligi texnikumining 150 nafar oʻquvchisidan 60 nafari nemis tilini oʻrganish istagini bildirib, joyida ularning roʻyxati shakllantirildi. Toʻgaraklar oʻz ishini 20-apreldan boshlaydigan boʻldi.
